1386 Juni 17. Brieg

Privileg für das Hedwigsstift, die Kirchenkleinodien, sowie die demselben geschenkten Häuser betreffend.

In nomine domini amen. Ad perpetuam rei memoriam nos Ludwicus dei gracia dux Slezie dominus Bregensis notum facimus tenore presencium universis tam presentibus quam futuris, quod cum ad laudem et reverenciam omnipotentis dei, gloriosissime virginis Marie sanctorum omnium et signauter Baptiste necnon Hedwigis electe, patronorum nostrorum, in castro nostro Bregensi Wratislaviensis diocesis ecclesiam collegiatam prelatorum et canonicorum secularium sub modis, habitu et observancia ecclesie kathedralis Wratislaviensis alias dudum fundaverimus, construxerimus et auctore deo dotaverimus certis censibus et redditibus prout desuper diverse sunt litere continencie plenioris, nos pro modulo facultatis nostre divinam nobis clemenciam magis facere propiciam cupientes non improvide neque per errorem sed liberaliter, non coacti nec illecti, sed de nostra certa sciencia pro decore domus dei, quam sincero corde dileximus et diligimus, ob nostrorum progenitorum heredum et successorum proprieque animarum remedium salutare diversis successuris temporibus assignavimus et donavimus prelatis, canonicis et capitulo ecclesie collegiate Bregensis predicte res infrascriptas omnes et singulas pro usu divini cultus et ipsius ecclesie nichil nobis aut heredibus et successoribus nostris in eis aut earum qualibet penitus reservantes, primo videlicet aureum et omnes alios deauratos et argenteos calices cum ampullis et quecunque vasa sacra signanter aspersorium argenteum cum suis attinenciis, item baculos videlicet domini decani pariter et rectorum eiusdem ecclesie cum argenteis suis insigniis, item crucem maiorem pariter et minorem cum omnibus et singulis reliquiarum thecis, servaculis et monstranciis, tam aureis quam argenteis et earum reliquiis et sanctuariis, item omnia plenaria tam magna quam parwa cum eorum reliquiis et sanctuariis nullis prorsus exclusis, item ladulas, capsas et scrinia continentes et continencia reliquias qualescunque, res quoque alias ad ornatum, usum et decorem ipsius ecclesie quemlibet pertinentes, item ornatus quoslibet missarum et altarium tam preciosas quam minoris precii consistentes ibidem, item cappas, indumenta sive paramenta quelibet alia sacra tam ea, que in presencia habentur ibidem quam ea, que applicabuntur adhuc per nos vel alium quempiam in futurum, quibuscunque nominibus, vocabulis et nuncupacionibus censeantur, item libros omnes et singulos chorales, cantuales, lectionales, ecclesiasticos et tam scolasticas quam juris canonici vel arcium et singulariter sacre pagine seu theologie volumina et quaternos; huiusmodi res universas et singulas, prout presentibus expressantur, generaliter et specialiter exnunc de novo liberaliter et in perpetuum damus, donamus, tradimus, applicamus, adiungimus et realiter assignamus in perpetuum prelatis et canonicis ac capitulo supradictis. Item assignamus et donamus eisdem omnia et singula ornamenta ecclesiam ipsam decorancia spectanciaque ad usum ipsius, que sunt vel fuerunt in futurum comparata per nos vel alium quempiam et donata. Item damus, assignamus, asscribimus et incorporamus et de nostra certa sciencia irrevocabiliter assignamus, applicamus prelatis canonicis et capitulo memoratis domum capituli in cimiterio ipsius Bregensis ecclesie constitutam cum cellario pro vino ecclesie et pro potu ipsius capituli tenendo et cum suo estuario per nos constructo superius et collegio inferius instaurato pro eiusdem capituli actibus capitularibus et aliis usibus eorum necessariis et signanter comodum prope idem estuarium constituatum, ubi pro presenti libri servantur, pro liberaria donavimus et assignavimus, donamus et assignamus in perpetuum per presentes, supremo duntaxat comodo, ad quod per murum de Castro Bregensi transitur, nobis heredibus et successoribus nostris inibi specialiter reservato. Et ne res et domus huiusmodi cum earum attinenciis superius expressatis ad prophanos usus seu laycos quoslibet revertantur, et ne quispiam heredum et successorum nostrorum ad easdem res dei piis usibus dedicatas manus mittere audeat temerarias, sub obtestacione divini judicii per aspersionemque sanguinis Jesu Christi presentibus districtissime prohibemus hortantes reverendum in Christo patrem et dominum Wenczeslaum episcopum Wratislaviensem dominum et patruum nostrum carissimum, quatenus ipse auctoritate ordinaria pastorali dignetur res et domum predictas sum suis omnibus et singulis attinenciis, prout superius expressius designantur, incorporare, inviscerare pariter et aplicare in perpetuum prelatis, canonicis et capitulo supradictis et tamquam res alias ecclesiasticas libertate sub titulis oportunis atque mandare sub penis ecclesiastice censure late sentencie, quam incurrant, si secus facerent, nostris heredibus presentibus et futuris et aliis quibuslibet cuiuscunque condicionis, gradus ordinis seu dignitatis existunt, ne presumant ausu nephando res et domum huiusmodi usurpare, aufferre, alienare a dicta ecclesia vel alias distrahere quovismodo seu ad laycos usus reducere vel prophanos, qui pocius manuteneant eas circa dictam ecclesiam inviolabiliter et conservent, prout indignacionem omnipotentis dei et sanctorum eius necnon penas late sentencie voluerint evitare. In cuius rei testimonium presentes fieri iussimus et nostri sigilli munimine roborari. Datum Brege die sancte et individue trinitatis, anno domini millesimo trecentesimo octuagesimo sexto, presentibus nostris fidelibus Theodrico de Rechinberg, Theodrico de Redirn, Johanne et Conrado fratribus de Borsnicz capitaneis nostris, Henrico Rabenow, Johanne Wadewicz et Thoma de Gobin canonico Bregensi nostro notario, qui presencia habuit in commisso.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 9, Urkunden der Stadt Brieg. Urkundliche und chronikalische nachrichten über die Stadt Brieg, die dortigen Klöster, die Stadt- und Stiftsgüter bis zum Jahre 1550. Hrsg Dr. C. Grünhagen, Breslau 1870.